كيف استطاع ايلون ماسك صنع التاريخ

ازاي قدر ايلون ماسك يصنع التاريخ؟

.

"قدرة سبيس أكس على الوصول إلى المدار ونقل الحمولات بشكل آمن إلى الفضاء ليست موضع تساؤل. من ناحيتي، أنا لن أستسلم أبدًا، وأنا أعني ذلك"

.                                     

الكلام ده قاله ايلون ماسك في أغسطس 2008، بعد ثالث فشل للصاروخ فالكون 1، الصدمة اللي دفعت الجميع وقتها لتوقع أن شركة سبيس اكس خلاص معادش معاها فلوس، محاولة واحدة كمان وهتفلّس.

.

كما أظن، فيه 5 أسباب كانت وراء أن ايلون ماسك دلوقت، بينما نتحدث، بيصنع التاريخ كونه صاحب أول شركة خاصة في التاريخ تبعت رواد فضاء للمحطة الدولية، بأسعار لم يكن أحد ليحلم بها.

.

رقم واحد، القاعدة الإقتصادية البسيطة اللي بتقول: اصنعها بنفسك، ودي كانت هيا هياها قاعدة "تسلا"، قبل سبيس اكس الصواريخ كانت عبارة عن قطع كل واحدة منها بتيجي من مكان، على ما تجيلك لازم وسطاء وأرباح على تلات أربع مستويات، هنا ماسك كان في زيارة لروسيا بيدور على صواريخ لما سأل نفسه: سعر الحديدة نفسها بكم؟

.

يعني لو احنا هنجيب احنا الحديد والنحاس والبلاستك والليلة دي كلها ونوزنها ونتمّنها، يطلع كم؟ الإجابة كانت 3% من تمن الصاروخ الحقيقي، هنا ماسك قال لك: بسيطة، نعمله احنا من الصفر، وهو ما قد كان.

.

رقم اتنين، الخبرة، لو تلاحظ .. معظم الشركات بتفتح مصانعها في أفريقيا وآسيا عشان العمالة الرخيصة، ماسك قال لك "لأ"، احنا نبني مصانعنا هنا، مش بس كده، جنب المصانع نحط المكاتب الإدارية والبحثية، عشان يكون فيه متابعة مستمرة للشغل، ومع الوقت العاملين في شركته أخدوا خبرة خرافية، وده تسبب في سرعة كبيرة (من 2002 لحد دلوقت؟ شيء غير مسبوق)

.

رقم تلاتة، التسويق، في كل شيء له علاقة بسبيس اكس هتجد حتة تلفت انتباه الناس، قرص جبنة في الفالكون 9 لما انطلق أول مرة، ديناصور لعبة طلع معاهم امبارح، عربية تسلا راحة المريخ مع المركبة، الكبسولة "دراجون" اسمها اصلا متاخد من أغنية شهيرة Puff, the Magic Dragon واسم فالكون متاخد من فيلم حرب النجوم، ماسك يعي جيدًا أن: الكلام على لسان الناس تمنه فلوس، وبيلعب بالحتة دي كويس قوي، قدرته على خلق الترندات ابداعية.

.

رقم أربعة، العبث الهندسي مسموح به، شيء عجيب لدرجة أن الكثيرين بدأوا بالاستهتار بأحلام الراجل ده، لكن تعالا بص النهاردة على الصواريخ وهيا راجعة للأرض تاني؟ 6 حيل هندسية ذكية للغاية كانت السبب في التكنيك ده.

.

نقطة أخيرة، فلسفة ماسك بسيطة: "نحن لا نبتكر شيء جديد، نحن نعيد النظر إلى ما هو موجود بالفعل"، ده مهم لأنه بيفتح الباب لمعرفة حدود شغلك، وفي خلفية الفلسفة دي وضع ماسك في دماغه النقطة الوحيدة اللي بتخللي أي مدير عبارة عن بطة ذهبية للمستثمرين: ازاي نقلل التكاليف؟

.

لكن أكتر شيء لفت نظري لماسك كان أنه من بعد ما كسب الـ165 مليون دولار من بيعة الباي بال، تحول لفلسفة حياة جديدة:

.

ماسك بيفكرني ببطل فيلم limitless اللي امتلك قدرة عقلية فذة عن طريق حبّاية دوا، ايدي بطل الفيلم لما امتلك القوة دي كلها طمح لشيء واحد فقط، مش الشهرة، و لا الفلوس، لكن: العظمة. 

.

في الحتة دي تحديدا بشوف ايلون ماسك، لأنه دايما شغوف، مش بس بتحقيق انجاز مختلف أو مكسب كبير وهو ما يحدث بالفعل، لكن بتحقيق درجة من العظمة لنفسه، خاصة لما بيقف يتكلم - كأنه ملك هذا العالم - عن رغبته في الذهاب للمريخ.

.

حقيقي تجربة لافتة

-